၂၀၂၀ ပြည့်နှစ်၊ မတ်လ ၁၆ ရက်

 မန္တလေး၊အောင်မြေသာစံမြို့နယ်အထွေထွေအုပ်ချုပ်ရေးဦးစီးဌာန အစည်းအဝေးခန်းမတွင် ၂ဝ၂ဝပြည့်နှစ်၊ မတ် ၁၄ ရက် နံနက် ၁ဝ နာရီက (၂၀၁၉-၂ဝ၂ဝ)ဘဏ္ဍာရေးနှစ်အတွက် ပြည်ထောင်စုနှင့်တိုင်းဒေသကြီးရန်ပုံငွေတို့ဖြင့် ဆောင်ရွက်မည့်တည်ဆောက်ရေးလုပ်ငန်းစီမံကိန်းများနှင့်ပတ်သက်၍ ညှိနှိုင်းအစည်း အဝေးကို ကျင်းပရာ ပြည်သူ့လွှတ်တော်ကိုယ်စားလှယ် ဒေါက်တာလှမိုး၊ အမျိုးသားလွှတ်တော်ကိုယ်စားလှယ် ဒေါက်တာသန်းဝင်း၊ မန္တလေးတိုင်းဒေသကြီး Third Party(Q.C)အဖွဲ့ဝင် ဦးအောင်ကျော်မြင့်၊မြို့နယ်အုပ်ချုပ်ရေးမှူးဦးမြင့်ဆောင်နှင့်ဌာနဆိုင်ရာများကုမ္ပဏီ ၂၁ ခုမှ မန်နေဂျင်းဒါရိုက်တာများနှင့် အင်ဂျင်နီယာ များတက်ရောက်ခဲ့ကြသည်။

 ရှေးဦးစွာ ပြည်သူ့လွှတ်တော်ကိုယ်စားလှယ် ဒေါက်တာလှမိုးက ယခုနှစ် အောင်မြေသာစံမြို့နယ်အတွင်း ဝန်ကြီးဌာနပေါင်းစုံမှ တည်ဆောက်ရေးလုပ်ငန်းများ ဆောင်ရွက်ရန် ကုမ္ပဏီများကို ချထားပေးပြီးဖြစ်ကြောင်း၊ လုပ်ငန်းများ အမြန်ဆုံးစတင်ကြရန်၊ ယမန်နှစ် အတွေ့အကြုံများအရ ယခုနှစ်လုပ်ငန်းများအား  ဘဏ္ဍာရေးနှစ် သတ်မှတ်ရက်အတွင်း မဖြစ်မနေ အပြီးတည်ဆောက်ကြရမည်ဖြစ်ကြောင်း၊ စံချိန်စံညွှန်းနှင့်အညီ အရည်အသွေးကောင်းမွန်အောင် ဆောင်ရွက် ကြရန်ပြောကြားသည်။ ဆက်လက်၍  Third Party (Q.C) မှ ဦးအောင်ကျော်မြင့်၊ မြို့နယ်အုပ်ချုပ်ရေးမှူး ဦးမြင့်ဆောင်တို့က လုပ်ငန်းအရည်အသွေး စစ်ဆေးရေးနှင့်ပတ်သက်၍ လိုအပ်ချက်များကိုမှာကြားခဲ့သည်။

 ထို့နောက် တက်ရောက်လာကြသည့် ကုမ္ပဏီများမှလုပ်ငန်းများ ဆောင်ရွက်ပြီးစီးမှုများကို အသီးသီးတင်ပြကြရာ လွှတ်တော်ကိုယ်စားလှယ်များက လိုအပ် ချက်များကို ညှိနှိုင်းပေါင်းစပ်ဆောင်ရွက်ပေးသည်။ ယင်းနောက် အမျိုးသားလွှတ်တော် ဒေါက်တာသန်းဝင်းက “ကုမ္ပဏီများအနေဖြင့် အဆောက်အအုံများ ဆောက်လုပ်ရာတွင် မိမိကိုယ်ပိုင်အဆောက်အအုံကဲ့သို့ သဘောထားက စေတနာအပြည့်အ၀ထား ဆောင်ရွက်ပေးကြပါ၊ ထိုက်သင့်သော အကျိုးအမြတ် လည်းယူကြပါ၊ လုပ်ငန်းကိုလည်းအရည်အသွေးကောင်းအောင်ဆောင်ရွက်ကြပါ၊ အခက်အခဲရှိပါကတင်ပြကြပါ၊ ညှိနှိုင်းပေါင်းစပ်ဆောင်ရွက်ပေးမည် ဖြစ်ကြောင်း လုပ်ငန်းခွင်များသို့လည်း အခါအားလျော်စွာ လာရောက် ကြည့်ရှူစစ်ဆေးမည်ဖြစ်ကြောင်း”ပြောကြားပြီး အစည်းအဝေးကို ရုပ်သိမ်းလိုက်ခဲ့သည်။