၂၀၁၉ ခုနှစ်၊ နိုဝင်ဘာလ ၄ ရက်

 မန္တလေးတိ်ုင်းဒေသကြီးအတွင်း အစားအစာဘေးအန္တရာယ်ကင်းရှင်းရေးစီမံကိန်းကို စားသုံးသူများအတွက်ဓာတုအန္တရာယ်ကင်းစင်သော အစားအသောက်များရောင်းချသည့် ဈေးတစ်ဈေးပေါ်ပေါက်လာစေရန်၊ အနာဂတ်တွင် စိုက်ပျိုးရေးနည်းစနစ် GAP ညီညွတ်သောဈေးကွက်တစ်ခု ပေါ်ထွန်းလာရေး ပညာပေးလုပ်ငန်းများအပါအဝင် အထောက်အကူပြုလုပ်ငန်းများဆောင်ရွက်ရန်၊ ဓာတုအန္တရာယ်ကင်းစင်သော Food Safety Model Farms ပေါ်ထွက်လာစေရေးအတွက် ပဏာမခြေလှမ်းအဖြစ်ဆောင်ရွက်ရန် ရည်ရွယ်ချက်များဖြင့် ဆောင်ရွက်လျက်ရှိသည်။

 Food Safety Project ကို မန္တလေးတိုင်းဒေသကြီးအစိုးရအဖွဲ့ စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီး ဒေါက်တာစိုးသန်းအား ဥက္ကဋ္ဌအဖြစ် ဆောင်ရွက်ကာ အဖွဲ့ဝင် ခုနှစ်ဦးဖြင့် ဖွဲ့စည်းပြီး မန္တလေးတိ်ုင်းဒေသကြီး စိုက်ပျိုးရေးဦးစီးဌာန တိုင်းဒေသကြီးဦးစီးမှူးမှ အဖွဲ့ခေါင်းဆောင်အဖြစ် တာဝန်ယူကာ စီမံကိန်းဖော်ဆောင်ရေးကို စိုက်ပျိုးရေးဦးစီးဌာန ဝန်ထမ်း ၁၂၈ ဦးဖြင့် ဖွဲ့စည်းဆောင်ရွက်လျက်ရှိသည်။ လုပ်ငန်းဆောင်ရွက်မှုအနေဖြင့် စီမံကိန်းလုပ်ငန်းတစ်ခုဖြစ်သော Model Farm လုပ်ငန်းဆောင်ရွက်ရန်အတွက် မြို့နယ်(၈)မြို့နယ်တွင် သီးနှံ(၁ဝ)မျိုး၊ မြေဧရိယာစုစုပေါင်း ၂၃၆ ဧကအား ကနဦးဆောင်ရွက်ရန်လျာထားပြီး ဆီထွက်သီးနှံမြေပဲတွင် ဓာတ်ကြွင်းနှင့် မှိုအဆိပ် ကင်းစင်ရေးစမ်းသပ်လုပ်ငန်းအဖြစ် ညောင်းဦးမြို့နယ်တွင် မြေပဲစိုက်ဧက(၂၆ဝ၆၅)ဧကဖြင့် ဆောင်ရွက်ရန်လျာထားသည်။

 Food Safety ရှေ့ပြေးစီမံချက်အဖြစ် ကျောက်ဆည်မြို့နယ်တွင် ကန်စွန်း၊ ပဲတောင့်ရှည်၊ ဘိုစားပဲ ဂေါ်ဖီထုပ်၊ ခရမ်းချဉ်၊ ငရုတ် ၂၁၅ ဧကနှင့် မြေပဲ ၁၅၁၁၂ ဧကအား စမ်းသပ်စိုက်ပျိုးထားရာ နိုဝင်ဘာ ၁ ရက်က မန္တလေးတိုင်းဒေသကြီး စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီး ဒေါက်တာစိုးသန်းနှင့် အဖွဲ့ဝင်များ ကွင်းဆင်းကြည့်ရှုကြသည်။