၂၀၁၉ခုနှစ်၊ သြဂုတ်လ ၂၀ ရက်

 မန္တလေးမြို့၊ အောင်မြေသာစံမြို့နယ်၊ ၁၂ လမ်းနှင့် ၇၃ လမ်းထောင့်ရှိ လူငယ်သင်တန်းကျောင်းအတွက် အလှူရှင်များ၏ လှူဒါန်းမှုဖြင့် လိုအပ်သည့် တည်ဆောက်ခြင်းများနှင့် ပြုပြင်ထိန်းသိမ်းခြင်းများ ပြီးစီး၍ လွှဲပြောင်းပေးအပ်ပွဲကို သြဂုတ် ၂၀ ရက် နံနက် ၉ နာရီက အဆိုပါ အစည်းအဝေးခန်းမတွင် ကျင်းပသည်။

 လွှဲပြောင်းပေးအပ်ပွဲသို့ မန္တလေးတိုင်းဒေသကြီးအစိုးရအဖွဲ့ သယံဇာတနှင့် သဘာဝပတ်ဝန်းကျင်ထိန်းသိမ်းရေးဝန်ကြီး ဦးမျိုးသစ်၊ မန္တလေးတိုင်းဒေသကြီးလူမှုဝန်ထမ်းဦးစီးမှူးရုံး၊ ညွှန်ကြားရေးမှူး ဒေါ်ခင်စန်းရီနှင့် သက်ဆိုင်ရာဌာနမှ တာဝန်ရှိသူများ၊ အလှူရှင်များဖြစ်သည့် Latter-Day Saint Charities(LDSC)နှင့် လူမှုဖွံ့ဖြိုးတိုးတက်ရေးအသင်း(CDA)တို့မှ တာဝန်ရှိသူများ၊ လူငယ်သင်တန်းကျောင်းမှ ဆရာ၊ ဆရာမများနှင့် ကျောင်းသားလေးများ၊ ဖိတ်ကြားထားသူများ တက်ရောက်ကြသည်။

 ရှေးဦးစွာ သယံဇာတနှင့် သဘာဝပတ်ဝန်းကျင်ထိန်းသိမ်းရေးဝန်ကြီး ဦးမျိုးသစ်က အဖွင့်အမှာစကားပြောကြားပြီး Latter-Day Saint Charities(LDSC)မှ Kent Larsen က လှူဒါန်းရခြင်း ရည်ရွယ်ချက်များကိုလည်းကောင်း၊ လူမှုဝန်ထမ်းဦးစီးဌာန၊ ညွှန်ကြားရေးမှူး ဒေါ်ခင်စန်းရီက လှူဒါန်းမှုအတွက် ကျေးဇူးတင်စကားကိုလည်းကောင်း ပြောကြားသည်။

 ဆက်လက်၍ မန္တလေးလူငယ်သင်တန်းကျောင်းမှ ကျောင်းသားလေးများက မြတ်ဆရာသီချင်း၊ ကျွန်တော့်ရည်မှန်းချက်သီချင်း၊ စည်းလုံးခြင်းအတွက် သီချင်းတို့ဖြင့် သီဆိုကာ တေးသရုပ်ဖော်၍ ဖျော်ဖြေကြပြီး ဝန်ကြီး ဦးမျိုးသစ်က အလှူရှင် Latter-Day Saint Charities(LDSC)မှ တာဝန်ရှိသူတစ်ဦးကိုလည်းကောင်း၊ ညွှန်ကြားရေးမှူး ဒေါ်ခင်စန်းရီက အလှူရှင် ဦးမောင်မောင်နှင့်ဇနီး၊ ဒေါ်မိုးပပကြည်(အောင်တံခွန်စိန်ပန်းထိမ်)မိသားစုကိုလည်းကောင်း၊ ဒုတိယညွှန်ကြားရေးမှူး ဦးသက်လှိုင်ထွန်းက အလှူရှင် ဒေါ်မီမီအောင်(နီလာပန်းခြံ)မိသားစုကိုလည်းကောင်း၊ မန္တလေးလူငယ်သင်တန်းကျောင်းအုပ် ဦးနေအောင်ကျော်က အလှူရှင် ဦးဘိုထွေးနှင့်ဇနီး၊ ဒေါ်ညိုညိုဝင်း(ဗိုလ်ကလေး)မိသားစုကိုလည်းကောင်း ဂုဏ်ပြုမှတ်တမ်းလွှာများ ပေးအပ်ကြသည်။

 လူမှုဝန်ထမ်း၊ ကယ်ဆယ်ရေးနှင့်ပြန်လည်နေရာချထားရေးဝန်ကြီးဌာန၊ လူမှုဝန်ထမ်းဦးစီးဌာန၊ မန္တလေးတိုင်းဒေသကြီးလူမှုဝန်ထမ်းဦးစီးမှူးရုံး၏ ချိတ်ဆက်ပေးမှုဖြင့် အလှူရှင်များ၏ လှူဒါန်းမှုများ၌ မန္တလေးလူငယ်သင်တန်းကျောင်းတွင် ပြုစုစောင့်ရှောက်ထားသော ကျောင်းသား (၃၆၀)ဦးကျော်အား နေ့စဉ်အသုံးပြုရန်အတွက် မိလ္လာကန်အကြီး တစ်ကန်၊ ရေဂါလံ (၈၀၀)ဆံ့ ရေစင် တစ်စင်၊ ရေကန် ၃ ကန်၏ အမိုး သုံးခု၊ ရေမော်တာအိမ် တစ်ခုနှင့် ပင်မဆောင်ရှိ ရုံးခန်းနှင့် ရေချိုးခန်း၊ အိမ်သာများ အဆင့်မြှင့်တင်ပေးခြင်း၊ ကျောင်းသားများ အိပ်ဆောင်တစ်ဆောင်နှင့် ပြင်ပဆောင်ကျောင်းသားများ အိပ်ဆောင်အတွင်း ကြမ်းခင်းကွပ်ပျစ်များ၊ ကျောင်းခြံဝင်းသံပန်းတံခါး တပ်ဆင်ခြင်းများ ပါဝင်သည်။