၂၀၁၉ ခုနှစ်၊ နိုဝင်ဘာလ ၇ ရက်

 ရတနာပုံတက္ကသိုလ် ဘူမိဗေဒဌာနနှင့် မြန်မာ့ပတ်ဝန်းကျင်သိပ္ပံတို့ကကြီးမှူး၍ တတိယအကြိမ်မြောက် မြန်မာနိုင်ငံကမ္ဘာမြေသိပ္ပံဆိုင်ရာ ကွန်ဖရင့် (The Third Myanmar National Conference On Earth Science, MNCES-2019) ဖွင့်ပွဲအခမ်းအနားကို နိုဝင်ဘာ ၇ ရက် နံနက် ၈ နာရီခွဲက ရတနာပုံတက္ကသိုလ်ရှိ ပြည်ထောင်စုခန်းမ၌ကျင်းပသည်။

 အခမ်းအနားတွင် မန္တလေးတိုင်းဒေသကြီးအစိုးရအဖွဲ့ သယံဇာတနှင့်သဘာဝပတ်ဝန်းကျင်ထိန်းသိမ်းရေးဝန်ကြီး ဦးမျိုးသစ်က အဖွင့်အမှာစကား ပြောကြားရာတွင် နိုင်ငံတစ်နိုင်ငံ၏ဖွံ့ဖြိုးတိုးတက်မှုသည် ၎င်းနိုင်ငံ၏ ပညာရေးဖွံ့ဖြိုးတိုးတက်မှုအပေါ်တွင် မူတည်နေပြီး ပညာရေးသည် နိုင်ငံနှင့် လူမျိုးတို့၏ အခြေခံဖြစ်ကြောင်း၊ နိုင်ငံတော်က ပညာရေးပြုပြင်ပြောင်းလဲမှုများကို အရှိန်နှင့်ဆောင်ရွက်နေကြောင်း၊ အရည်သွေးမြင့် ပညာရေးကသာလျှင် နိုင်ငံတော်အတွက် လိုအပ်သည့် အဆင့်မြင့်ပညာကျွမ်းကျင်မှုများကို ပေးစွမ်းနိုင်မည်ဖြစ်ပြီး မညီမျှမှုများကို လျော့နည်းစေကာ ပိုမိုငြိမ်းချမ်းပြီး အားလုံးအတွက် သာယာလှပသည့်အနာဂတ်ကို ဖန်တီးပေးနိုင်မှာဖြစ်ကြောင်း၊ တက္ကသိုလ်များတွင် ဒေသနှင့် လူမှုစီးပွားကို အထောက်အကူပြုသည့် အသုံးချသုတေသနလုပ်ငန်းများကို ဦးစားပေးဆောင်ရွက်ကြရန် တိုက်တွန်းအားပေးပြောကြားလိုကြောင်း၊ ဆရာ၊ ဆရာမများအနေဖြင့် ကျောင်းသား၊ ကျောင်းသူများ သင်ယူတတ်မြောက်မှု အရည်အသွေးမြင့်မားရေးအတွက် ညီညီညွတ်ညွတ် ပူးပေါင်းဆောင်ရွက်ကြစေလိုကြောင်း ထည့်သွင်းပြောကြားသည်။

 ထို့နောက် ရတနာပုံတက္ကသိုလ်ပါမောက္ခချုပ် ဒေါက်တာမောင်မောင်နိုင်၊ မြန်မာနိုင်ငံဘူမိသိပ္ပံအသင်း ဥက္ကဋ္ဌ ဦးကြိုင်စိန်နှင့် တာဝန်ရှိသူများက ကွန်ဖရင့်နှင့်ပတ်သက်၍ အမှာစကားပြောကြားပြီးနောက် မြန်မာနိုင်ငံကမ္ဘာမြေသိပ္ပံဆိုင်ရာကွန်ဖရင့်ကျင်းပရေးကော်မတီ အတွင်းရေးမှူး ဒေါက်တာမျိုးသန့်က ကွန်ဖရင့်ကျင်းပရခြင်းကို ပြောကြားခဲ့သည်။

 မြန်မာနိုင်ငံကမ္ဘာမြေသိပ္ပံဆိုင်ရာကွန်ဖရင့် ပထမအကြိမ်ကို ၂၀၁၇ ခုနှစ် နိုဝင်ဘာလတွင် မုံရွာတက္ကသိုလ်၌လည်းကောင်း၊ ဒုတိယအကြိမ်ကို ၂၀၁၈ ခုနှစ် နိုဝင်ဘာလတွင် ဟင်္သတတက္ကသိုလ်၌လည်းကောင်း ကျင်းပခဲ့ပြီး ၂၀၁၉ ခုနှစ် နိုဝင်ဘာ ၇ ရက်တွင် မန္တလေးမြို့ ရတနာပုံ တက္ကသိုလ်၌ တတိယအကြိမ်ကို ကျင်းပသည်။

 မြန်မာနိုင်ငံအတွင်း ဘူမိဗေဒနှင့် ကမ္ဘာမြေသိပ္ပံဆိုင်ရာပညာရပ်နယ်ပယ်များ ဖွံ့ဖြိုးတိုးတက်ရေး၊ ဘူမိဗေဒဌာနများနှင့် နှီးနွှယ်သည့်ဌာနများ တွင် သုတေသနလုပ်ငန်းစဉ် အဆက်မပြတ် ပူးပေါင်းဆောင်ရွက်သည့်အလေ့အကျင့်များ ပိုမိုဖွံ့ဖြိုးတိုးတက်ရေး စသည့်ရည်ရွယ်ချက်များဖြင့် ကျင်းပခြင်းဖြစ်သည်။

 ရတနာပုံတက္ကသိုလ်တွင် နှစ်ရက်တာကျင်းပသည့် တတိယအကြိမ် မြန်မာနိုင်ငံကမ္ဘာမြေသိပ္ပံဆိုင်ရာကွန်ဖရင့်တွင် တက္ကသိုလ် ၃၀ ခုနှင့် ဌာန ၃ ခုတို့မှ သုတေသနစာတမ်း ၁၇၁ စောင် ဖတ်ကြားတင်သွင်းသွားမည်ဖြစ်ပြီး နိုဝင်ဘာ ၇ ရက်၊ ၈ ရက်၊ နှစ်ရက်တာ ကျင်းပသွားမည်ဖြစ်သည်။

 အဆိုပါ ကွန်ဖရင့်ဖွင့်ပွဲသို့ မန္တလေးတိုင်းဒေသကြီးအစိုးရအဖွဲ့ ဝန်ကြီးများ၊ အငြိမ်းစားဘူမိဗေဒပညာရှင်ဆရာကြီးများ၊ တက္ကသိုလ်အသီးသီးမှ ပါမောက္ခချုပ်များ၊ ဒုတိယပါမောက္ခချုပ်များ၊ ဘာသာရပ်ဌာနအသီးသီးမှ ပါမောက္ခ၊ ဌာနမှူးများ၊ ပါမောက္ခများ၊ သုတေသနစာတမ်းရှင် ဆရာ၊ ဆရာမများနှင့် ဖိတ်ကြားထားသူများ တက်ရောက်ကြသည်။