၂၀၂၀ ပြည့်နှစ်၊ ဇန်နဝါရီလ ၁၃ ရက်

  မန္တလေး၊ ပြည်ကြီးတံခွန်မြို့နယ်၊ တံခွန်တိုင်အဝိုင်းအနီး Mandalay Industrial Center စီမံကိန်းဝင်းအတွင်း ဇန်နဝါရီ ၁၂ ရက် ညနေပိုင်းက Garden City Apartment Complex အိမ်ရာအပ်နှံပွဲ အခမ်းအနားကို ကျင်းပသည်။

  အဆိုပါအိမ်ရာများမှာ နယူးစတားလိုက်ကုမ္ပဏီအုပ်စုမှ အကောင်အထည်ဖော်တည်ဆောက်သည့် Garden City Apartment Complex(GCAC)တိုက်ခန်းများကို ဝယ်ယူအားပေးသူများထံသို့ လွှဲပြောင်းပေးအပ်ခြင်းဖြစ်ပြီး အခမ်းအနားတွင် မန္တလေးတိုင်းဒေသကြီး အစိုးရအဖွဲ့ဝင် စီမံကိန်းနှင့်ဘဏ္ဍာရေးဝန်ကြီး ဦးမြတ်သူက အဖွင့်အမှာစကားပြောကြားသည်။

 ဆက်လက်၍ ဆရာကြီး ပါမောက္ခ ဒေါက်တာအောင်ထွန်းသက်က ဂုဏ်ပြုစကားကို လည်းကောင်း၊ နယူးစတားလိုက်ကုမ္ပဏီ အုပ်စု၏ ဥက္ကဌ ဦးကျော်ကျောင်ဝင်းက ကျေးဇူးတင်စကားကိုလည်းကောင်း၊ အထွေထွေမန်နေဂျာ ဦးစိုးနိုင်ဦးက Mandalay Management Corporation ၏ လုပ်ငန်းဆောင်တာများကိုလည်းကောင်း ပြောကြားပြီးနောက် နယူးစတားလိုက်ကုမ္ပဏီမှ တာဝန်ရှိသူများက Garden City Apartment Complex အိမ်ရာ စည်းမျဉ်းစာအုပ်များကို ဝယ်ယူနေထိုင်သော Customer များ၏ ကိုယ်စား (၁၆)ဦးအား ပေးအပ်ခဲ့သည်။

 အဆိုပါ စီမံကိန်းကို ၂၀၁၇ ခုနှစ် ဇူလိုင်မှစတင်၍ သတ်မှတ်ကာလအတွင်း ပြီးစီးအောင်ဆောင်ရွက်ခဲ့ကြောင်း၊ ခေတ်နှင့်အညီ ရင်ပေါင်တန်းနိုင်သော မြို့ပြလူနေမှုစနစ်ကိုတည်ဆောက်မည့်ရည်ရွယ်ချက်ဖြင့် အကောင်အထည်ဖော်၍ လုပ်ငန်းအားလုံးကို စံချိန်စံညွှန်းအကောင်းဆုံးဖြင့် တာဝန်ယူတည်ဆောက်ခဲ့ကြောင်း၊ မြေညီထပ်အပါအဝင် (၁၀)ထပ်အဆောက်အအုံများဖြစ်သည့် Twin Tower (၇)လုံးနှင့် Single Tower (၁)လုံးဖြစ်ပြီး အခန်း (၇၈၀)ပါဝင်ကြောင်း၊ အခန်းတိုင်းတွင် အမှိုက်ပစ်စနစ်၊ ရေ၊ မီး (၂၄)နာရီ၊ ဆိုင်ကယ်ရပ်နားရန်နေရာ၊ ကားရပ်နားရန်နေရာများ ပါဝင်ပြီး ပြည်တွင်း၊ ပြည်ပအတွေ့အကြုံနှင့် အရည်အသွေး ပြည့်ဝသော ဝန်ထမ်းများဖြင့် အိမ်ရာစီမံခန့်ခွဲမှုနှင့် Customer Service ဝန်ဆောင်မှုများပေးထားသည်။

 အဆိုပါအိမ်ရာအပ်နှံပွဲအခမ်းအနားသို့ မန္တလေးတိုင်းဒေသကြီးလွှတ်တော်ဥက္ကဋ္ဌ၊ တိုင်းဒေသကြီးအစိုးရအဖွဲ့ဝင် ဝန်ကြီးများ၊ ၎င်း တို့၏ ဇနီးများ၊ လွှတ်တော်ကိုယ်စားလှယ်များ၊ တိုင်းဒေသကြီးခရိုင်၊ မြို့နယ်အဆင့်ဌာနဆိုင်ရာများနှင့် အသင်းအဖွဲ့များမှ တာဝန်ရှိ သူများ၊ နယူးစတားလိုက်ကုမ္ပဏီအုပ်စုမှ တာဝန်ရှိသူများနှင့် ဖိတ်ကြားထားသူများ တက်ရောက်ကြသည်။