၂ဝ၂၁ ခုနှစ်၊ မတ်လ ၇ ရက်နေ့

မန္တလေးခရိုင်အတွင်းရှိ ရဟန်း၊ သံဃာတော်များအား COVID-19 ကာကွယ်ဆေး (ပထမ)အကြိမ် ထိုးနှံပေးခြင်းကို မတ်လ ၇ ရက်နေ့ ညနေ ၃ နာရီ အချိန်တွင် နိုင်ငံတော်ပရိယတ္တိသာသနာ့တက္ကသိုလ် (မန္တလေး)ရှိ မဟာဘွဲ့နှင်းသဘင်ခန်းမ၌ ကျင်းပပြုလုပ်ရာ အဆိုပါ ကာကွယ်ဆေးထိုးနှံခြင်းအခမ်းအနားသို့ မန္တလေးတိုင်းဒေသကြီးစီမံအုပ်ချုပ်ရေးကောင်စီ ဥက္ကဋ္ဌ ဦးမောင်ကိုနှင့်အဖွဲ့ဝင်များဖြစ်ကြသော ဗိုလ်မှူးကြီး ကျော်ကျော်မင်း၊ မန္တလေးမြို့တော်စည်ပင်သာယာရေးကော်မတီ၊ မြို့တော်ဝန် ဦးကျော်ဆန်း၊ ဦးမျိုးအောင်၊ ဦးသိန်းဌေး၊ မန္တလေးတိုင်းဒေသကြီး သာသနာရေးဦးစီးဌာန၊ ညွှန်ကြားရေးမှူး ဦးကျော်လှိုင်နှင့် တာဝန်ရှိသူများက ဆေးထိုးရန် ကြွရောက်လာသော ရဟန်း၊ သံဃာတော်များအား ဖူးမြော်ကန်တော့ပြီး ကာကွယ်ဆေးထိုးနှံပေးမှုအား ကြည့်ရှု၍ လိုအပ်သည်များ ဖြည့်ဆည်းဆောင်ရွက်ပေးခဲ့သည်။

အဆိုပါ COVID-19 ကာကွယ်ဆေးထိုးနှံရာတွင် မစိုးရိမ်တိုက်သစ်မှ (၉၉)ပါး၊ နိုင်ငံတော်ပရိယတ္တိသာသနာ့တက္ကသိုလ် (၂၁)ပါး၊ ကျောင်းထိုင်ဘုန်းကြီးသင်တန်းကျောင်းမှ(၁၇)ပါး၊ ဘွဲ့ခံဆရာတော်(၅) ပါး၊ စုစုပေါင်း (၁၄၂)ပါးတို့အား ကာကွယ်ဆေးထိုးနှံပေးခဲ့ပြီး ဆက်လက်၍ စာသင်တိုက်များမှ ဆရာတော်၊ သံဃာတော်များအား COVID-19 ကာကွယ်ဆေးများ ထိုးနှံပေးနိုင်ရေးဆောင်ရွက်သွားမည်ဖြစ်သည်။