၂ဝ၂ဝပြည့်နှစ်၊ ဇွန်လ ၁၈ ရက်

 COVID-19 ကူးစက်ရောဂါ ကာကွယ်၊ထိန်းချုပ်ကုသရေးဆိုင်ရာလုပ်ငန်းစဉ်များတွင် ပါဝင်ဆောင်ရွက်ခဲ့ကြသည့် စေတနာ့ဝန်ထမ်းများနှင့် ပရဟိတအသင်း အဖွဲ့များအား ဂုဏ်ပြုမှတ်တမ်းလွှာပေးအပ်ချီးမြှင့်ခြင်းကို ၂ဝ၂ဝပြည့်နှစ်၊ ဇွန်လ ၁၇ ရက်နေ့ နံနက် ၈ နာရီက အောင်မြေသာစံမြို့နယ်၊ ၇၃ လမ်းနှင့် ၁၂ လမ်းထောင့်ရှိ မန္တလေးလူငယ်သင်တန်းကျောင်း၌ ပြုလုပ်ခဲ့သည်။

 အခမ်းအနားတွင် မန္တလေးတိုင်းဒေသကြီးအစိုးရအဖွဲ့ သယံဇာတနှင့်သဘာဝပတ်ဝန်းကျင်ထိန်းသိမ်းရေးဝန်ကြီးဌာန ဝန်ကြီး ဦးမျိုးသစ်က အဖွင့်အမှာစကား ပြောကြားပြီးနောက် ပြည်သူ့လွှတ်တော်ကိုယ်စားလှယ် ဒေါက်တာလှမိုးက COVID-19 ကူးစက်ရောဂါ ကာကွယ်၊ထိန်းချုပ်ကုသရေးဆိုင်ရာလုပ်ငန်းစဉ်များကို ထိရောက်စွာ ဆောင်ရွက်နိုင်ရန်အတွက် အမျိုးသားအဆင့် စေတနာ့ဝန်ထမ်း ဦးဆောင်အဖွဲ့ကို ဖွဲ့စည်းသည့် အကြောင်းနှင့် တက်ကြွစာပါဝင်ဆောင်ရွက် ခဲ့သူများအား ဂုဏ်ပြုချီးမြှင့်ရခြင်းအကြောင်းများနှင့်ပတ်သက်၍ ပြောကြားသည်။

 ဆက်လက်၍ လွှတ်တော်အသီးသီးမှ ကိုယ်စားလှယ်များ၊ မြို့နယ်အုပ်ချုပ်ရေးမှူးရုံး၊ တိုင်းဒေသကြီးလူမှုဝန်ထမ်းဦးစီးဌာနရုံးတို့မှ တာဝန်ရှိသူများက စေတနာ့ဝန်ထမ်းများနှင့် ပရဟိတအသင်းအဖွဲ့များ၏ အဖွဲ့ခေါင်းဆောင်များကို နိုင်ငံတော်၏အတိုင်ပင်ခံပုဂ္ဂိုလ်၏ လက်မှတ်ပါဝင်သည့် ဂုဏ်ပြုမှတ်တမ်းလွှာ များကို အသီးသီးချီးမြှင့်ပေးအပ်ခဲ့သည်။

 အမျိုးသားအဆင့် စေတနာ့ဝန်ထမ်းဦးဆောင်အဖွဲ့မှ COVID-19 ကူးစက်ရောဂါ ကာကွယ်၊ထိန်းချုပ်ကုသရေးဆိုင်ရာလုပ်ငန်းစဉ်များတွင် မေတ္တာ၊ စာဂ၊ ဝိရိယကို အခြေခံပြီးပါဝင်ကူညီဆောင်ရွက်ခဲ့ခြင်းအတွက် ဂုဏ်ပြုမှတ်တမ်းလွှာချီးမြှင့်ပေးအပ်ခြင်းဖြစ်ရာ အောင်မြေသာစံမြို့နယ်အနေဖြင့် ပရဟိတအသင်း အဖွဲ့ ၄၆ သင်းတို့မှ စေတနာ့ဝန်ထမ်း ၁၆၆ ဦးအား ဂုဏ်ပြုမှတ်တမ်းလွှာများ ရရှိခဲ့သည်။