၂၀၂၀ ပြည့်နှစ်၊ သြဂုတ်လ ၂၅ ရက်

 မန္တလေးတိုင်းဒေသကြီးအတွင်းရှိ လူမှုအားမာန်အဖွဲ့များ Inclusive Self-Help Group (ISHG)တို့ အားထောက်ပံ့ငွေများပေးအပ်ခြင်းအစီအစဉ်များကို ဩဂုတ် ၂၅ရက်နေ့က  နွားထိုးကြီးမြို့နှင့် မြင်းခြံမြို့တို့ တွင် ပြုလုပ်ခဲ့သည်။

 အဆိုပါအစီအစဉ်များတွင် မန္တလေးတိုင်းဒေသကြီးအစိုးရအဖွဲ့ သယံဇာတနှင့်သဘာဝပတ်ဝန်းကျင်ထိန်းသိမ်းရေးဝန်ကြီး ဦးမျိုးသစ်က အဖွင့်အမှာ စကားများ ပြောကြားခြင်း၊ မန္တလေးတိုင်းဒေသကြီး လူမှုဝန်ထမ်းဦးစီးမှူးရုံး၊ တိုင်းဒေသကြီးဦးစီးမှူးဦးဇော်မင်းက ထောက်ပံ့ငွေပေးအပ်ရသည့် အကြောင်းရင်းအား ရှင်းလင်းပြောကြားခြင်းနှင့် လူမှုအားမာန်အဖွဲ့များကို ဝန်ကြီးနှင့်တာဝန်ရှိသူများက ထောက်ပံ့ငွေများပေး အပ်ခြင်းတို့ကို ဆောင်ရွက်ခဲ့ ကြသည်။

လူမှုအားမာန်အဖွဲ့များအား ထောက်ပံ့ငွေပေးအပ်ခြင်းအစီအစဉ်၌ မန္တလေးတိုင်းဒေသကြီးအတွင်းရှိ ကျန်ရှိနေသော မြင်းခြံမြို့နယ်မှ အဖွဲ့ ၃၃ဖွဲ့နှင့် နွားထိုးကြီးမြို့နယ်မှ အဖွဲ့ ၃၃ဖွဲ့တို့အား  တစ်ဖွဲ့လျှင် ကျပ်ဆယ်သိန်းဖြင့် စုစုပေါင်းကျပ်သိန်းခြောက်ရာ့ခြောက်ဆယ်ကို ပေးအပ်ခြင်းဖြစ်သည်။

လူမှုဝန်ထမ်းဦးစီးဌာနမှ ရပ်ရွာအတွင်းရှိ ထိခိုက်လွယ်သောအုပ်စုများအတွက် လူမှုကာကွယ် စောင့်ရှောက်ရေးလုပ်ငန်းများ ဆောင်ရွက်နိုင်ရန် သက်ကြီးသူများ ၊ လူငယ်များ ၊ အမျိုးသမီးများနှင့် မသန် စွမ်းသူများပါဝင်သော လူမှုအားမာန်အဖွဲ့များကိုဖွဲ့စည်း၍ အသက်ကြီးသူများ၏ ကျန်းမာရေး ၊ စားဝတ်နေ ရေး၊ အာဟာရထောက်ပံ့ရေးတို့ကို ရှေ့ပြေးစီမံကိန်းအဖြစ် စတင်ဆောင်ရွက်ခဲ့ကြောင်းသိရသည်။

လူမှုဝန်ထမ်းဦးစီးဌာနအနေဖြင့် ၂၀၁၈-၂၀၁၉ ဘဏ္ဍာနှစ်တွင် ပြင်ဦးလွင်မြို့နယ်ရှိ လူမှုအားမာန် အဖွဲ့၁၁ဖွဲ့အား တစ်ဖွဲ့လျှင် ကျပ်ဆယ်သိန်းဖြင့် ကျပ်သိန်းတစ်ရာ့တစ်ဆယ်ကိုလည်းကောင်း ၊ ၂၀၁၉-၂၀၂၀ ဘဏ္ဍာနှစ်တွင် ပုသိမ်ကြီးမြို့နယ်ရှိ လူမှုအားမာန်အဖွဲ့ ၉ ဖွဲ့၊ မတ္တရာမြို့နယ်ရှိ လူမှုအားမာန် အဖွဲ့ ၁၂ဖွဲ့၊ မြင်းခြံမြို့နယ်ရှိလူမှုအားမာန်အဖွဲ့ ၇ ဖွဲ့၊  နွားထိုးကြီးမြို့နယ်ရှိလူမှုအားမာန်အဖွဲ့ ၇ဖွဲ့တို့အား တစ်ဖွဲ့ လျှင်ကျပ်ဆယ်သိန်းဖြင့် ကျပ်သိန်းသုံးရာ့ ငါးဆယ်ကိုလည်းကောင်းထောက်ပံ့ငွေများပေးအပ်ခဲ့ပြီးဖြစ်သည်။

အဆိုပါ စီမံကိန်းကို ၂၀၁၉ခုနှစ်တွင် မန္တလေးတိုင်းဒေသကြီးအတွင်း ပြင်ဦးလွင်မြို့နယ် ၊ မတ္တရာ မြို့နယ်၊ ပုသိမ်ကြီးမြို့နယ်တို့တွင် စတင်ဆောင်ရွက်ခဲ့ပြီး ၂၀၁၅ခုနှစ်မှ ၂၀၁၈-ခုနှစ်ထိ အပူပိုင်းဇုန် လူမှုကာကွယ်စောင့်ရှောက်ရေးလုပ်ငန်းများအဖြစ် မြင်းခြံမြို့နယ် ၊ တောင်သာမြို့နယ်နှင့် နွားထိုးကြီးမြို့နယ်တို့ တွင် ထိခိုက်လွယ်အုပ်စုများ၏ဆင်းရဲမှုလျော့နည်းသက်သာရေးတို့အတွက် ကျေးရွာအခြေပြု လူမှုကာကွယ်စောင့်ရှောက်ရေးလုပ်ငန်းများအား အဖွဲ့ ဖွဲ့စည်းပေးခြင်း၊ထိခိုက်လွယ်မှုဆိုင်ရာအသိပညာများဖြန့်ဖြူးပေးခြင်းနှင့်သင်တန်းများပေးခြင်း၊ ကျေးရွာလူမှုကာကွယ်စောင့်ရှောက်ရေးဆိုင်ရာ ရန်ပုံငွေများ ထူထောင်ပေးခြင်း၊ ကျေးရွာတွင် ဝင်ငွေတိုးလုပ်ငန်းများထူထောင်ပေးခြင်းတို့ကိုဆောင်ရွက်ခဲ့ကြောင်း၊  အသက် ၈၅နှစ်နှင့်အထက် အဘိုး၊ အဘွားများအား လစဉ်ထောက်ပံ့ပေးခြင်း၊ သက်ကြီးရွယ်အိုများနှင့် မသန်စွမ်းသူများအား အာဟာရထောက်ပံ့ပေးခြင်း၊ ပြင်းထန်မသန်စွမ်းသူများအား လစဉ် ထောက်ပံ့ ပေးခြင်း၊ ကလေးများအား  အာဟာရပံ့ပိုးခြင်းများကို ဆောင်ရွက်ပေးကြပြီး ကျေးရွာများရှိ အသက်၆ဝနှစ်နှင့်အထက် သက်ကြီးဦးဆောင်၍ စိတ်ပါဝင်စားသူများအားလုံး ပူးပေါင်းပါဝင်ဆောင်ရွက်နိုင်သည့် လူမှုအားမာန်အဖွဲ့များ ဖွဲ့စည်းဆောင်ရွက်နိုင်ခဲ့သည်။

မန္တလေးတိုင်းဒေသကြီးအတွင်း၌ လူမှုအားမာန်အဖွဲ့ ၁၁၂ဖွဲ့ ဖွဲ့စည်းပြီးဖြစ်ရာ ပြင်ဦးလွင်မြို့နယ်တွင် ၁၁ ဖွဲ့၊ မတ္တရာ မြို့နယ်တွင် ၁၂ ဖွဲ့၊ ပုသိမ်ကြီး မြို့နယ်တွင် ၉ ဖွဲ့၊ မြင်းခြံမြို့နယ်တွင် အဖွဲ့ ၄၀၊ နွားထိုး ကြီးမြို့နယ်တွင် အဖွဲ့ ၄၀ တို့ဖြစ်သည်။

လူမှုအားမာန်အဖွဲ့များအား ထောက်ပံ့ငွေပေးအပ်ခြင်းအစီအစဉ်ကို နံနက်ပိုင်းက နွားထိုးကြီးမြို့နယ် အင်ကြင်းကမ္ဘာခန်းမတွင်လည်းကောင်း၊ မွန်းလွဲပိုင်းက မြင်းခြံမြို့နယ် ရွှေပြည်စိုးသာသနာ့ ဗိမာန်တွင်လည်းကောင်း အသီးသီးပြုလုပ်ခဲ့ရာ လူမှုအားမာန်အဖွဲ့ဝင်များ ၊ သက်ဆိုင်ရာဌာနများမှ တာဝန်ရှိသူများ၊ ဖိတ်ကြားထားသူများတက်ရောက်ခဲ့ကြသည်။